АШIЫЦРАКВА АУАГIА ЙРЫЛАРХIВИТI


АШIЫЦРАКВА АУАГIА ЙРЫЛАРХIВИТI
19.04.2019

Апрель а 2 Черкесск, амедицина колледж апны згIвадарахчарала КЧР а-Министерства аколлегия алачIвара акIвшатI. Ауи йалан КЧР а-Правительства а-Председатель йзаместитель СУЮНОВ Джанибек, социальна политикала, ауагIа рызгIвадарахчарала йгьи экологияла КЧР АуагIа Айззара (а-Парламент) акомитет апредседатель ЧЕРВОНОВА Елена, згIвадарахчарала КЧР аминистр ШАМАНОВ Казим, «Макс-М» медицина хъыхчара компания КЧР-ла ахъвшара аунашвачпагIв ГОЧИЯЕВ Борис, «Роспотребнадзор», «Росздравнадзор» КЧР-ла ахъвшараква, хIреспублика азгIвадарахчара нхартаква рынхагIвчва рпрофсоюз, айъазартаква рунашвачпагIвчва, айъазагIвчва. Айззара апны асквш 2018 агIан аминистерства шынхаз йгьи сынчIва ахачIвква йрылачважватI. Ари ауысла йгIачважваз Шаманов Казим цIыпх апхьадзараквала йгIадриуа рацкIыс адуней зхIваджьуа рыцIа йшмачIу гIайхIватI. – Ащацага, агвыхь, ажван згIваква йыргауа йгьи саби хвыцта йпсуа рпхьадзара йалдзгIатI. Асквш 2018 апны хIреспублика абзазагIвчва рызгIвадарахчара хIазынхауата йхIыхъвдаквыз ахачIвква хIырхъйатI. Амедицина анхагIвчва ръачIвагIадырра йалархIарала ауысквагьи хIылшатI. ЙагIвсыз асквш айъазагIвта 64-гIвы «Земский доктор» программа йаланакIтI. Ауи аъарагIвы хIреспублика акытква рмедицина нхартаква рпны рынхара джвыквырцIатI, – йхIватI аминистр. Шаманов Казим хIреспублика азгIвадарахчара нхартаква руыхварала, ргIаршIыцхрала нхарата йакIвшазгьи гIайхIватI. Ауи йшгIаликIгIазла, асквш 2018 агIан Черкесск город апны онкология диспансер шIыц, нархара щарда зму республика саби чымазагIвтара, а-Перинатальна Квта апны лаборатория шIыц гIахъыртIытI. – ЙагIвсыз асквш хIреспублика арайонкви агородкви рпны амедицина нхартаква раъаща агъьырчIвуата арчIаджьраква акIвшатI. А жва ахъазла, КъарчачкIвын, Къарча, Устьджьгваты, Прикубань, Зеленчук, Уарп районква рпны аквта чымазагIвтараква, афельдшер-акушер пунктква, амбулаторияква, ахIабльа чымазагIвтараква бзита йырхьпшытI. Черкесск город алагъь шта апны поликлиника шIыц руыхвитI, – йхIватI Шаманов Казим. Аминистр йцIыхъвахауа асквшква афедеральна квта ацхърагIарала «ЦхърагIара ласы» автомобильта 44 шгIарыртызгьи гIайхIватI, «Диспансеризация» йгьи «Вакцинация» программаква дахIврала абзазара йшаларжьуа гIаликIгIатI. – ХIреспублика апны атехнология шIыцква гIадрысабапуата ауагIа йддрадзауа амедицина цхърагIараквагьи тшауацIырхитI. Асквш 2013 агIан ркъьарата 80 акIвдыршазтын, йагIвсыз асквш 142-джь дыркъьатI, – йхIватI Шаманов Казим. Ауи асквш 2019 апны ахачIвквагьи дрыквгIашIастI. Аминистр йшихIвазла, «ЗгIвадарахчара» йгьи «Демография» уагIахъа проектква рыпкъ йтата йлырхыз ареспублика программаква (8 йнадзитI) рпны йгIарбу ахачIвква алачпапI. Ауат акытква рпны азгIвадарахчара нхартаква, асабийыртаква раъаща агъьчIвра, ареспублика щацага Квта уыжвгIанчIви медицина ъамапсымала йадгалра, агвы, ащацагаква йырпщылу датшагьи азгIваква йыргауа рпхьадзара йалырдзгIара, амедицина нхартаква ззыбжу айъазагIвчвала йадгалра йырзынархапI. – «Асквшква 2019–2024 руацIа Къарча-Черкес Республика азгIвадарахчара тшауацIнарыхра» йазалху акъральыгIва программа апкъ йтата йапшым азгIваква рабакIрала чкIвыныргIа йызгIваду абзазара йхънарыхра йгьи амедицина цхърагIараква рагъьчIврала анхараква акIвшуштI, ауат уагIата йгIарыланадыркIуаш щардагIвы йнадзитI, – йгIаликIгIатI аминистр Шаманов Казим. ЗгIвадарахчарала КЧР аминистр йгIайырбаз апхьадзараква йрыцикIуата дгIачважватI КЧР а-Правительства а-Председатель йзаместитель Суюнов Джанибек. Ауи Черкесск город йаныргIалу ареспублика Перинатальна Квта анхара йазынарху йгвбжараквагьи гIайхIватI. – Аминистр Шаманов Казим дангIачважвуз пхьадзараквакI агIвищттI. ХIреспублика абзазагIвчва йрыуата саби дзауа щардагIвы хIышта утыцIта арахьарат амедицина нхартаква тшырзынадырхитI. ЩардагIвы Ставрополь край агородква рпны саби шрауызла ашвъаква гIарыртитI. Черкесск город а-Перинатальна Квта шгIадыршIыцхызгьи, ауи тшазыназмырхауа, араъа саби рауырныс зымуа йызрылахIауа гьгвынгIвырам. СынчIвагIваца хIреспублика йбзазауа йрыуата датша зджьара саби зауыз 80-гIв йрайхIапI. Ауи уарыразуашта йгьаъам. СынчIва ари анархарала ауысква шагъьхIчIвуаш хIазшвырхъвыц, – йхIватI Суюнов Джанибек. Айззара апны йгIачважваз социальна политикала, ауагIа рызгIвадарахчарала йгьи экологияла КЧР АуагIа Айззара (а-Парламент) акомитет апредседатель Червонова Елена, «Макс-М» медицина хъыхчара компания КЧР-ла ахъвшара аунашвачпагIв Гочияев Борис, хIреспублика азгIвадарахчара анхагIвчва рпрофсоюз адкIылара апредседатель Лайпанов Ахмат згIвадарахчарала КЧР а-Министерства анхара ушарыразуа гIалыркIгIатI, апхъахьыла хачIвквагьи шацдырхъйуш рхIватI.

Считаешь эту страницу интересной? Поделись со всеми


Добавить новый комментарий