АШВАРАГIВАРАДАРА ДРЫМЧИТI


АШВАРАГIВАРАДАРА ДРЫМЧИТI
26.04.2019

КЧР а-Хъада ТЕМРЕЗОВ Рашид Махачкала апны РФ АшварагIварадара Совет а-Секретарь ПАТРУШЕВ Николай йакIвйыршаз айззара далан, ауи Лагъь КIавкIаз апны ауагIахъа шварагIварадара адгалра йапщылу ауысква йырзынархан. Айззара йалан СКФО-ла РФ а-Президент йгIащтийыгIв МАТОВНИКОВ Александр, СКФО аштаква рхъадаква, афедеральна министерстваква ргIащтийыгIвчва. Йызквчважвуш ауыс хъада йазцара апхъала Патрушев Николай асквш 2018 апрель агIан Черкесск йакIвшаз айззара апны йнарахвыз ащаквыргылраква шдырхъйаз даквгIашIастI. ЙагIвсыз асквш агIан МарагIацIцIырта Аргваны акъральква рахьыла йгIатыцIуа атерроризм Лагъь КIавкIаз аштаквала йгIадзушта шварагIвара ъагIаншаз йгIалцIла атерроризми аэкстремизми рабакIра рымчра атахъыта ахачIвква лырхтI. Россия АшварагIварадара Совет асекретарь йшихIвазла, ахабзахчара органква, йазалху акъвырльыкъвхартаква аштаква рвласть органква ркъаругьи алата ауи апш нхараква акIвдыршатI. Ауи йагIарбагата экстремизмра злу ачвгъахараква 8 проценткIла йрылдзгIатI, терроризм нархара зму ачвгьахараква – хынла. Йара ауаса ахабза мыгIвхъыргауата абджьар, агIвжвагаква гIазрысабапуа рпхьадзара йалдзгIатI. – Ага ауаса йаъазтынгьи, адуней террорист организацияква рмурад йгьакъвыцIуам, йалкIгIата рорганизация чкIвыныргIа шаларжьуаш йащтапI, – йхIватI Патрушев Николай. Айззара апны СКФО аштаквала патриот бжьарала, чкIвыныргIа ъадабнамыс рыквта йгIадзныргылрала амальква нахвра йазынархаз ащаквыргылра шдырхъйазгьи йаквчважватI. Патрушев Николай чкIвыныргIа рорганизацияква йрыцкIрала амальква йшрыладырхIаз гIаликIгIатI. Асквш 2018 агIан аволонтерква, зтахъырала ауысква гIаджвыквызцIауа чкIвыныргIа йрыцыркIуата сом мильуан 83 аъара рзалырхтI. УахьчIва «Россия апхьагIвчва рымгIвайсра», «Кадет йгьи апшгIагIвчва рымгIвайсра», «Волонтеры Победы», «Юнармия» мгIвайсраква бергьыльхитI, тшауацIырхитI. – Асоциальна сетьква рпны апропаганда нхара рымчра, акъральгIв джьауапкIра йалархIара, хIуыжвгIанчIвиква нхарала рдахIвраква рхабар ргара, Россия йту ауагIахъаква ркультура, рцIасква йгьи ртурых йахаргIвазара магIын ду рымапI, – йгIаликIгIатI РФ АшварагIварадара Совет а-Секретарь. Айззара апны абылчIвы-энергетика нхартаква рпны анхагаква раъаща ауатыкв йгIатаргатI. УахьчIвала апромышленна шварагIварадара атахъыраква мыгIвхъгахауата анхагаква ажвытI, ауи йгIалцIла анорма апкъ йтыцIуата электроэнергията, газта йырчвыдзуа щардапI. Ауи акIвымкIвагьи, абзазагIвчва йгIадрысабапыз аэлектроэнергия, агаз рыхъазла рпсарчIвква йрылахIитI. Аэнергия гIалцIыртаква згъычуа, ахабза мыгIвхъыргауата агазцага труба хъадаква тшырпызщылуа йадгалу ачвгьахагIв гвыпквагьи аъапI. Патрушев Николай айззара йалаз ауат абжараква шдрыдзуашла, ачвгьахагIв гвыпква шгIашIаркIуашла ажванахъаква гIаргырныс тшырзынайырхатI. АшварагIварадара Совет айззара апны ажвлара-политика аъаща тынчымкIва йызчпара змураду ргIашIакIрала амальквагьи йрыквчважватI. – Атерроризм йапшIагылуа акомиссия анхара йаццауата атерроризм идеология мчыта хIапшIагылра атахъыпI, – йхIватI Патрушев Николай. – ЗымгIва йрапхъата чкIвыныргIа атерроризм йгьи аэкстремизм идеяква шырзынамдзушла амальква нахIмахвуата йгьауашым. Ауи анхара апхьартаква рпны йджвыквцIара магIын ду амапI, йгIарысабапра атахъыпI ажвлара хабарргагаква йгьи а-Интернет. СКФО-ла РФ а-Президент йгIащтийыгIв Матовников Александр йгIачважвара апны абылчIвыэнергетика нхартаква ршварагIварадара адгалра аштаква рхъадаква, афедеральна министерстваква, ахабзахчара органква йгьи аэнергетика нхартаква йырзацалу хачIв хъадата йгIаликIгIатI. КЧР а-Хъада Темрезов Рашид айззара апны йгIачважвара хIреспублика ауацIала ажвлараполитика аъаща аларпIатIара гIашIакIрала амальта йнарахвуа йазынархан. Ауи йшгIаликIгIазла, ауагIахъа шварагIварадара йазарархауа гIашIаркIра ахъазла Къарча-Черкес акъральыгIва власть органква, ашIыпIа хъаунашвахъцIара органква ахабзахчагIвчва йрыцта агIашIакIра нхараква гватра ду рзалырхитI, уагIахъа амакIыра, дин апшIагылра гIанзмыршуш ауысква адыргалитI. РыцIа йхъадахугьи – терроризм йгьи экстремизм злу ачвгьахараква йаназаману йшгIашIаркIуаш апшта амальква нарахвитI. Ауи анархарала анхараква асквш 2025-дза Россия Федерация апны атерроризм апшIагылрала а-Стратегия апкъ йтата йадыргалитI. Ареспублика архъйара власть органкви адин адкIылараква рапхъагылагIвчви йагвынгIвуата йацынхитI, йцIасу ахабзаква шгIархчуш, чкIвыныргIа арадикальна дин мгIвайсраква йшрыланамхIвуш йащтапI. – Архъйара власть йгьи ашIыпIа хъаунашвахъцIара органква ахабзахчара органква, акъральгIв жвлара институтква йрыцта йнарахвыз амальква рбзирала Къарча-Черкес ашта апны ажвлара-политика аъаща тынчпI. Ауи анархарала анхараква гьашIахIрысуашым, – йрыбагъьатI Темрезов Рашид.

Считаешь эту страницу интересной? Поделись со всеми


Добавить новый комментарий