АУАГIА РТЫНЧРА АХЧАРА ЙАЗГЫЛАПI


АУАГIА РТЫНЧРА АХЧАРА ЙАЗГЫЛАПI
05.04.2019

Черкесск город акультура Тдзы апны «Росгвардия» йахъыцIыз ахысквша дыртлапIауата айззара акIвшатI. Ауи йалан КЧР а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель УАЗ Аслан, КЧР-ла афедеральна инспектор хъада ДРАЛЬЩИКОВ Игорь, «Росгвардия» КЧР-ла а-УнашвахъцIарта знапIыцIу САЛПАГАРОВ Рашид, ауацIа уысквала КЧР аминистр ТРИФОНОВ Игорь, Черкесск город амэр ТАМБИ Руслан, шварагIварадарала афедеральна къвырльыкъвхарта (ФСБ) КЧР-ла а-УнашвахъцIарта, КЧР а-Верховна суд, асуд приставква рфедеральна къвырльыкъвхарта КЧР-ла а-УнашвахъцIарта, КЧР айсра комиссариат ргIащтийыгIвчва. Айззара гIахъыртIуата «Росгвардия» акъвырльыкъвхагIвчва Россия Федерация йгьи «Росгвардия» рбаракъква асцена йхъаргылтI. УадыргIвана Россия йгьи КъарчаЧеркес ргимнква йгIарыстI. Айззара йалаз зборч зырхъйауата зхъа щтIазцIаз ахабзахчара органква рынхагIвчва хъмаштылра дакъикъа йрызгылтI. Россия Федерация а-«Росгвардия» архъвква р-Федеральна къвырльыкъвхарта адиректор Золотов Василий «Росгвардия» КЧР-ла а-УнашвахъцIарта акъвырльыкъвхагIвчва ръачIвагIа гвыргъьахъвла дгIарайхIвахIвуата авидеотшазынархара гIадырбатI. Ауи амщтахь КЧР а-Хъада Темрезов Рашид «Росгвардия» КЧР-ла а-УнашвахъцIарта акъвырльыкъвхагIвчви аветеранкви драйхIвахIвтI. – Хысквшала утхъахта йгIаншаз «Росгвардия» атерроризм йгьи аэкстремизм рабакIра, акъральыгIва, ажвлара ршварагIварадара хчара, датшагьи анархараквала йалачпу хачIвы рыхъвдаквпI. «Росгвардия» КЧР-ла а-УнашвахъцIарта акъвырльыкъвхагIвчва, хIреспублика авласть органква, арахьарат ахабзахчара органква рацынхара абзирала Къарча-Черкес йтынчу СКФО асубъектква йрылапхьадзапI, – йхIватI Темрезов Рашид. – Швари хIари хIкъраль йгIазарархарныс змураду руыс пIайква гIардахIвырныс йахамдзаскIва хIышта ашварагIварадара хчарала амальква гIахIрысабапра атахъыпI. Ауи бзита йзылшауа «Росгвардия» КЧР-ла а-УнашвахъцIарта акъвырльыкъвхагIвчва йапшым ачвгьахараква ргIашIакIра, уагIа щарда злу айззараква тынчта йакIвшара, акъральыгIва объектква рхчара йрызгылата рхачIвква хъацIарала йдырхъйитI. КЧР а-Хъада зкъвырльыкъвхара борч гвхътIыла йзырхъйауа «Росгвардия» КЧР-ла а-УнашвахъцIарта йагъьу анхагIвчва «Къарча-Черкес Республикала гIатгара зму аюрист», «Къарча-Черкес Республикала гIатгара зму акъральыгIва къвырльыкъвхара анхагIвы» чIахIра хьызква рквнайыргатI, аразыра швъаква риттI. Ари атшын «Росгвардия» КЧР-ла а-УнашвахъцIарта акъвырльыкъвхагIвчва ахабзахчара йазгылата, акъральгIвчва ршварагIварадара рхчауата йаладзыз рчвахъабага ащапIы ахIврапшдзаква щтIарцIатI. КЧР АуагIа Айззара (а-Парламент) а-Председатель Иванов Александр, КЧР а-Правительства а-Председатель Уаз Аслан, КЧР-ла афедеральна инспектор хъада Дральщиков Игорь, «Росгвардия» КЧР-ла а-УнашвахъцIарта знапIыцIу Салпагаров Рашид, ауацIа уысквала КЧР аминистр Трифонов Игорь, шварагIварадарала афедеральна къвырльыкъвхарта КЧР-ла а-УнашвахъцIарта знапIыцIу Плодовский Юрий, Черкесск гарнизон айсра прокурор Козуб Алексей акъвырльыкъвхагIвчва ръачIвагIа гвыргъьахъвла йрайхIвахIвтI, «Росгвардия» КЧР-ла а-УнашвахъцIарта йагъьу анхагIвчва аофицер хьызкви артшхъвагакви рквнадыргатI. Салпагаров Рашид «Росгвардия» Къарча-Черкес Республикала акадрква рхъвшара аунашвачпагIв Хъабльахь Мадина аполиция дшаполковникхазла ашвъаква литтI. Иванов Александр КЧР АуагIа Айззара (а-Парламент) ачIахIра грамотаква зитыз дрыуапI «Росгвардия» КЧР-ла а-УнашвахъцIарта акъвырльыкъвхагIв, аполиция апрапорщик Швотыкъ Юрий. – Ачвгьахараква ргIашIакIра, ауагIа ртынчра хчара йазгылу акъвырльыкъвхагIвчва згIвадара багъьа, насып швзыстахъта швъачIвагIа гвыргъьахъвла сшвайхIвахIвитI. ХIреспублика абзазагIвчва ртынчра рхчауата зхъа щтIазцIаз акъвырльыкъвхагIвчва зынгьи йыгьхIхъаштылуашым, – йгIаликIгIатI Иванов Александр. АуагIа ртынчра хчара йазгылата зхъа щтIазцIаз афырква ртгIачваква йанакIвызлакIгьи йырцхърагIитI. Салпагаров Рашид айззара йдрайгваз зборч зырхъйауата йщхаз ранчва, рахщчва, рыпхIчва ажва пхаквала тшырзынайырхатI, ахча согIаква риттI. АгIачважвараква рымщтахь айззара йалаз рыхъазла концерт акIвшатI. 

Считаешь эту страницу интересной? Поделись со всеми


Добавить новый комментарий