РШВАПХА БАЙА ЧКIВЫНЫРГIА ЙРЫЦАГIВЫРШИТI


РШВАПХА БАЙА ЧКIВЫНЫРГIА ЙРЫЦАГIВЫРШИТI
26.04.2019



Асквш 2011, апрель а 17 йгIашIарышвта Россия Федерация апны сквшигIадза ауацIа уысквала акъвырльыкъвхара аветеранква ры-Мш дыртлапIитI. КЧР-ла МВД апынгьи сквшщарда ахабзахчара органква йрылата йынхаз ауи атшын гватра рзалхра цIасхатI. СынчIва Черкесск город йаныргIалу асаби азъазара апхьарта апны ауи агвыргъьахъв мшыла аветеранква йъарайхIвахIвыз айззара адыргалтI. Ауи атшын йгIадрайгваз аветеранква ргвпква йрылаз йкIазкIазуаз рмедальквали рорденквали йгвынгIвырахун ауат йалачпу къвырльыкъвхара мгIва шгIамырдаз. Агвыргъьахъв йалан КЧР-ла МВД аминистр, агенерал-майор ТРИФОНОВ Игорь Юрий йпа, ауацIа къвырльыкъвхара аполковник, КЧР-ла МВД аминистр йзаместитель СЕРЕДА Александр Григорий йпа, къральыгIва уыхварала йгьи хабзалыхрала КЧР АуагIа Айззара (а-Парламент) акомитет апредседатель УМАЛАТОВ Владимир Амырби йпа, айсра, анхара, Абджьар Къаруква йгьи ахабзахчара органква рветеранква КЧР-ла рыжвлара организация апредседатель ТХIАКIВЩЫН Николай Алхим йпа, КЧР-ла МВД а-Жвлара совет апредседатель йзаместитель АТАБИЕВА Мария МухIарби йпхIа, КЧР-ла МВД аветеранква р-Совет а-Председатель ТЕМРЕЗОВ Юрий Азретали йпа. Айззара акIвзыршуз аветеранква ргвыргъьахъв Мшыла пхата драйхIвахIвтI йгьи КЧР-ла МВД аветеранква р-Совет апредседатель Темрезов Юрий Азретали йпа ажва йылттI. – Россия Федерация ауацIа уысквала аминистр Нургалиев Рашид асквш 2010, август а 12 агIан йгIацIищтыз аунашвала асквш 2011, апрель а 17 ауацIа уысквала акъвырльыкъвхара аветеранква ры-Мш хIыртлапIитI. УахьчIва хIкъраль ашварагIварадара, ажвлара атынчра гвыцкьала йазынхаз акъвырльыкъвхагIвчва хIрайхIвахIвитI, ауат йдырхIаз ашвапха йрыщтагIайуа ахабзахчагIвчва абанпараква йдхIырдыритI, рфырра йгьи рхъамайгьдзара ахабарква ажвлара, йалкIгIата чкIвыныргIа, йрылагIгитI. ХIкъвырльыкъвхара аветеранква тшпсщара йанчIвахрагьи уыс ду дырхъйитI – ашIаква йрынйалитI, ажвлара уысква йрылапI. Асквш 2018 ауацIала Къарча-Черкесла МВД йаветеранта агIгIвы адуней рхIваджьтI, ауат гIахIгвалашвахуата хъмаштылра дакъикъа хIшвыргыл, – йхIватI ауи. Айсра, анхара, Абджьар Къаруква йгьи ахабзахчара органква рветеранква рыжвлара организация апредседатель ТхIакIвщын Николай йгIайззаз аветеранква драйхIвахIвтI. Ауи Абашта айсра Ду агIан КIавкIаз агIархвитхра ахабзахчагIвчва къарута йаларцIаз шдуу гIаликIгIатI, ауи азаман агIаншараква атурых йгIалахара ахIатырла йазалху фильм ахъырхырныс шырмураду йхIватI. – Араъа йгIайззаз ащардагIв здыритI, сквшщарда срыцынхатI, ари апш гвыргъьахъв ъадыжвгалыз швабыжта сайгвыргъьитI. Саргьи йыгьсквшыкIым ахабзахчара съадзазынхаз, йшвырхъйауа ауыс амагIны цIолата йгIасгвынгIвитI, ауи йгIалцIла йанакIвызлакIгьи гватра швзалсхырныс схIазырпI, йсылшауала сшвцхърагIуштI, съашврайгвауа айззараква гьагIвсщтуашым. МВД аветеранква ры-Мшла сшвайхIвахIвуата аветеранквагьи, уахьчIвала ахабзахчара йазгылугьи ауагIа йшвызрыму азхъацIара йалымдзгIауата, швкъвырльыкъвхара тынчта швбзазарныс швзыстахъпI, – йхIватI къральыгIва уыхварала йгьи хабзалыхрала КЧР АуагIа Айззара (а-Парламент) акомитет апредседатель Умалатов Владимир Амырби йпа. КЧР-ла МВД а-Жвлара совет апредседатель йзаместитель Атабиева Мария аветеранква драйхIвахIвтI, сквшщарда швапха гIазхъырхуаш ахIбачвата ашIаква йырзалырныс, згIвадара багъьа рымазларныс шырзылтахъу гIалылкIгIатI. – АуацIа уысквала акъвырльыкъвхара аветеранква ры-Мшла йгIайззазгьи йызгIадымгылызгьи срайхIвахIвитI. УахьчIва ажвлара атынчра, амамыр ахчара зынцIра шабгу йазыназырхаз ауагIа йрымшпI. Ймайрам ахачIвква зырхъйуз, зхъа йамайгьдзауата аквыргъвгъвара ъану йнадзуз, уахьчIвала ашIаква йрыдынхалуа ахIвахIвра ажваква швзынасырхитI. МВД апны аветеранква йалкIгIу гыларта швымапI. Швара швапхата йшвырхIаз йгIадзынгылуа ашIаква рбжьара апны йгIарысабапра амагIны дупI. Апхъахьылагьи аполиция анхагIв шIаква йшвылшауала цхърагIара шдшврадзуш йазхъасцIитI, – йхIватI КЧР-ла МВД аминистр, агенерал-майор Трифонов Игорь Юрий йпа. Ауи атшын ачIахIра грамотаквала йгIалыркIгIаз аветеранква йрыуапI ДзыгIва Юрий Зальым йпа йгьи Батырби АхIмад МухIадин йпа. Ауат «КЧР-ла МВД чIахIра зму аветеран» хьзы шгIарквнадыргаз зырцIабыргуа агвплацIаква гIарырттI. АуацIа уысквала акъвырльыкъвхара аветеран Батырби АхIмад ахIвахIвраква йшрыцикIуа йхIватI, артшхъвага ъагIайыртыз швабыжта йшигвапу гIаликIгIатI, агвыргъьахъв адгалагIвчва йразыра ажваква рзынайырхатI йгIацIасуа ашIаква йшйылшауала дырцхърагIарныс йыргвыгъатI. Хъвыжвду ййыз, Псыжв кыт йгIадзынгылыз Батырби АхIмад фырра гIазырбаз ауацIа уысквала акъвырльыкъвхагIвчва дрыуапI. Ауи абджьарла йадгалу ачвгьахагIвчва дырпшIагылтI. Йара хвырта хIатла гIайадзатI, ауаса йынбжьагIвчвагьи ачвгьахагIвчва йлапшыцIарцIаз ауагIагьи гIайхчатI. АхIмад йфырра ахъазла Россия Федерация а-Президент йунашвала «За заслуги перед Отечеством» орден й-2-хауа степень гIайквнадыргатI. Ауи амщтахьгьи ауи йкъвырльыкъвхара гьнийымжьтI, йатаркIвах ахвыртаква гIайадзатI йгьи йызгIвадара аъаща йгIалцIла тшпсщара дчIвахтI. Ауаса Батырби АхIмад атынчра тшгьайымттI, Черкесск город а-Дума дадепутатта жвлара уыс щарда йырхъйитI. Айззара йдрайгваз рыхъазла согIата йалтI Черкесск асаби азъазара апхьарта апны ашвахIвара, агIахIвраква тшырзызбжьауа ачкIвынчви ахIвсси йадыргалыз аконцерт.



Считаешь эту страницу интересной? Поделись со всеми


Добавить новый комментарий