ЗБЗАЗАРА НХАРАЗ АХЪАЦIА


ЗБЗАЗАРА НХАРАЗ АХЪАЦIА
26.04.2019

МшкIы, сабша мшыта, ащажь апхъа машинакI сгвашв йгIашIастI. СгварцIызтын, щарда цIуата йыздыруа, Гвым дзыгIв агъьмала йаъу ПрицепиловкIа хIабльа йалсуа ПервомайскIа урам йбзазауа Ахмат Виталий амашина дгIатыцIын, гвапата сальам гIасайхтI, снапIы йкIытI. «Унайгва, ачIвыйа ащажь апхъа усызгIазг, хайырта йгIацIщт», – схIван, сас тлапIакI йапшта тшизынасырхатI. «БзипI, хайырпI сыззгIайыз, саба апрель а 29 сквш 85 йхъыцIитIта, агазет апны мачIкI угIайыквчважварныс йквнагата йспхьадзитI, йъахIыльчвагьи йаргьи йрымдыруата согIата йзысчпара стахъыпI», – йхIватI Виталий дыззгIайыз ауыс сахайыргIвазауата. Заба йгIапсара здыруа, дызхъмаштылуа, хвы йыквызцIауа ачкIвын спсы рыцIагьи дазаргванхатI, сизыраздзата «АлахI йдуу уымгIва хъитIуаштI заба йгIапсара хвы азызбауа, дызрыразуа, йквнагадзапI йыхьыз схIварныс», – йасхIвтI. «Йауашызтын, уачIвы амтшаша асабиквагьи хIаргьи хIаъазлуштI, сгIайта машинала ухъазгылуаштI», – йхIватI Виталий аджвыквылхра тшазичпауата. «Сапызкъьуш закIгьи гIанымшузтын, угIайра сазымпшуата сара машинала снахъалуаштI», – дсыргвыгъатI Виталий. ХIшангIалыз апшта, амтшаша атшын, щыбжьанщтахьква рапшта, АхматргIа ргвашв машинала снадххылтI. Агвашв йачвыхъарамкIва йгылаз аквчIварта йыквчIваз АхматргIа Назири йхъапщыла Фариди аташвартала тшазызчпахуаз амара нурква йгвыргъьуз ршIахъаква гIадыркIкIун. Амашина сшгIатыцIуаз агIвыджьгьи пхата йгIаспыралын, рбзазартала сдрайгватI. АхматргIа рытшгIва апшвымаква рквпшырала ауи аъара сквшы гьрутуашым. Ауаса дзачIвызлакIгьи йбаргвыз, рбзазара атурых йгIалахаз мгIва гIамырдатI. Назир йан йшылхIвахуазла, асквш 1934 агIан мгва дтата йаба Къасбот адуней йхIваджьтI. Ауи йчкIвынхъа хIкъраль рахIа йзаман чIвыхьыз асквшква йрыквшватI – арепрессияква, айсра, амла, агIапсара нхара, йалпIлаз аколхозква ргIащаквыргылхра… Ахмат Назир дъагIадзынгылыз атгIачва гьхвыцмызтI – 7-гIвы йнадзун, пщыгIвпачви хгIвыпхIчви. АтгIачва раба данырхъыдзгIа рыцIа йахIбачваз Цибульа (Сульман) йгьи Джьамаль аколхоз йалата йынхун, рахвы дырхIун, адгьыл дырхарджьуан. Асквш 1939 агIан ахIба Цибульа «кадровая служба» ззырхIвуз дцатI. Йкъвырльыкъвхара далган, мшквакIла дгIадзахуаштIхIва атгIачва шйызпшуаз айсра гIалагатI. Ауи ахабар загIаз йгIвыджьхуз Джьамальгьи йахIварала айсра дпшцIалтI, й-Псадгьыл ахчара дазгылтI. АгIвыджьгьи гьгIахънымхIвыхтI, хIмамыр бзазара ахъазла рхъаква щтIарцIатI. – Айсра амщтахьла закIы-гIвба класс Хъабльахь Катйа салрыпхьатI, уацIыхъван апхьара кIасрышвын, аферма нхара сцатI, Абашта айсра Ду алгъачI йгIалсыз, «Путь Ленина» колхоз ахшгIахьарта ферма йаунашвачпагIвта йдыргылыз Майлов НурмухIамад дгIвычIвгIвыс гвыбзыгъан, апхьахьакI дйапшын, ауи йакIвпI аферма хIварагIазагIвта сзырцаз, – йгIайгвалашвахитI Назир. «АуагIа ракIвпI гIвычIвгIвыста уызчпауа» рхIвитI. Ахмат Назир дчкIвынта дызднагалыз ахIбачва, арахвхчаква ДжьмакъвылргIа Рамазан, Хзыр, ажвхьагIвчва Хвби МикIола, ХвытI Кълычгьари, Джьмакъвыл МишкIа, Эгьзакь Нуращид, Айсан Зальымхан, амацIаугIвы ХвытI Даханагъва датшагьи рбжьагажва гвыбзыгъа, ршвапха пшдза, кърарта, гIвычIвгIвысагIарата йрылаз ддмыргIващауата йбзазара мгIва лихтI. Ауи Абашта айсра Ду йгIахъынхIвыхыз Кълыч Мазан унашва зхъицIуз афермагьи сквшщарда жвхьагIвыта дынхатI. Ауаъа дшынхузымцара ар дызшIыртын, артиллерия рхъвы дрылата хысквша къвырльыкъв йхатI. ДангIахъынхIвых аферма жвхьара датацахын, тшпсщара дцандзыкIьара дынхатI. Назир асквш 1960 агIан унагIвара далалтI. Йылахь йгIанылыз акыт ХъабльахьргIа ртпхIа Фариди йари асквш 1969-ква рагIан Гвым дзыгIв агъьмала йаъу ПрицепиловкIа хIабльа апны гIвпещ чкIвынкI Сальыкъ Мыхтат йпны йырхвгIан, рбзазара джвыквырцIатI. – Бзазара хIъацаз ашта уагIвырльын, ауаъа йацIхIхъийыз атшгIва хIымрыхьуата, гвакъвпракIгьи хIашIамшвауата, акъыльаквшвара хIызбжьата уахьчIва йъагIадзазгьи АлахI йдуу хIйырбзазитI, – йхIвитI Назир йылахь дазыразта. – ЦгIвысабичва хIымапIта ауатгьи рылахь сазыразпI, хIыщта пшдза йтагылапI, йгIазлыцIыз ауагIахъа рыхьыз гьнадыркъвуам, хIгIапсара хвы аквырцIауа, райгвыгIврала хIкIвыршата хIысквшква нагIдаситI. Ауи гьнасыпрамма! Ахмат Назир «ажвынтахъа пшдза» ззырхIвауа агIамта дтагылапI, акIьадыгв дызцбзазауа йпа Виталий цIагылагIв багъьата дизалитI, ауи йыхыгIвсабичва йбжьагажва гьрыгйырхум, анашхыйагIвакви агвыргъьахъвкви найдаситI, абзазара дангIалитI. Дыззынадзаз агIамта апны йсабиква йгIарыцIагылыз ажвагIвысабичва, ауат йгIадрихыз ахвыгIвгьи йбахьатI. Акыт ахIбачва пшдзаква йрыуу, збзазара нхараз ауасаражв гвыбзыгъа Ахмат Назир йапхъахькIьалагьи хайыр щарда йбарныс йзыхIтахъпI
 Предыдущая новость


Считаешь эту страницу интересной? Поделись со всеми


Добавить новый комментарий